13. ESZENA

TROGLOBIOAK

 

(espek estalaktika zatia kontu handiz zakuan gorde eta plastikozko pote txiki bat eta metalezko pintza batzuk ateratzen ditu. Haitzuloko hormetan zerbaiten bila hasten da)

 

LEO: Noizbait irten ere egin beharko gara, ezta? (Haitzuloan sartzeko erabilitako soka hartu eta poliki-poliki biltzen hasten da)

ESPE: (Serio) Lehenik troglobio batzuk hartu nahi ditut.

LEO: Troglobioak... Ikaragarrizko grazia egiten dit hitz horrek, tro-glo-bi-o-ak.

ESPE: Ba ez dakit zergatik. Troglobioak. “Troglo”: haitzuloa eta “Bio”: izaki biziduna... Haitzuloetan bizi den izaki biziduna. Ez dakit arrarotik zer duen.

LEO: (Soka biltzen jarraitzen du) Bai, behin baino gehiagotan entzun dizut, baina grazia egiten dit.

ESPE: (Paretako alutik gertu zerbait aurkitzen du) Begira, sasieskorpio bat!

LEO: (Gerturatuz) Nolako besoak dituen, e! Arin-arina dantzatu behar duela dirudi.

ESPE: Ziur hauek gizakiek baino kultura handiagoa dutela.

LEO: Ez al duzu hartuko?

ESPE: Ez. Horrelako gutxi geratzen dira... Jarrai dezala bere bidea. (Pauso batzuk aurreratu eta frontalaren fokua publikoarengana zuzentzen du) Begira! Hemen troblobio pila batdaude...

LEO: Bai erraz ikusten dituzula! Eskarmentua...

ESPE: Trikimailu bat erabiltzen dut. Burua astiro-astiro biratzen dut frontalaren argia mugitzeko, eta zerbaitek distira egiten duela ikustean...

LEO: Fokua aldatu!

ESPE: Ba bai. Funtsean gauza bera da: fokua aldatu.

LEO: (esperengana hurbildu eta publikoari begiratzen dio) Ikusten ditut. Ze distiratsuak diren, e? Seguru guri begira daudela.

ESPE: Ezin dute ezer ikusi. Ez duzu ikusten ilunpetan bizi direla?

LEO: Tira, benetako jakinduria itzaletan dago. Gogoratzen?

ESPE: (Irribarre egiten du) Irudikatzen dituzu guri begira eta hau guztia antzerki obra bat dela pentsatzen?

LEO: (Publikoa agurtuz) Kaixo troglobio maiteak!

ESPE: (Barrez) Begira! Distiratsuagoak dirudite. Kaaaaiiiiixooo!

LEO: (Berak ere barre egiten du) E! Joan aurretik antzezpen bat egingo diegu? Ni bere haitzuloan arropa garbitzen ari den lamia bat izango naiz

ESPE: Lamiek arropa ere garbitzen al dute? Nik uste nuen ilea orrazten zutela.

LEO: Kondaira batzuetan arropa garbitzen agertzen dira.

ESPE: Orduan gure amonak kontatzen zigun Galiziako istorio baten antzekoa da... As Lavandeiras.

LEO: Primeran! Orduan zuk “Lavandeira”rena egingo duzu eta nik “Lamia”rena. (Pantailaren atzeko aldera joaten da)

ESPE: (Interpretatzen) Troglobio maiteak, zuekin “Lamia” eta “Lavandeira” eta gure azken sorkuntza: “Sorgin baten ametsak”... (Pantailaren atzeko aldera joaten da) Zugatik, amona!