Goaz antzerki talde historikoak 35 urte daramatza Debako Antzerki Astea antolatzen, eta aurtengo edizioan beren lokala ere baliatzearen aldeko apustua egin dute. Areto txiki bezain txukuna daukate, eta bertan ikusi dugu Tolosako Katiuska taldearen Armiarma antzezlana, aulki ia denak beteta zeudela.

      Idoia Gereñu gidari edo arima duen taldeak era kolektiboan jardun du antzezlanaren sorkuntza-arloetan, testuak eta dramaturgia sortuz, musikak eta argiak aukeratuz eta jantzien zein elementu eszenikoen gaineko erabakiak hartuz. Eta emaitza eszenikoa, borobila izateaz gain, dramaturgia berrien eremuan koka dezakegu batere zalantzarik gabe.

      Goaz taldeko arduradun batek amatatu ditu aretoko argiak, eta etengailuari eman baino lehen esan du: “Bueno, hastera goaz”. Horrela gustatzen zaizkigu kontuak gure Euskal Herrian. Antzerkira joan gara, hau da, kultur ekitaldi jasoenetariko batera, baina ez dugu horregatik hitz potolorik entzun behar. Ekintzek egin dezatela berba, eta ez hitzek.

      Ordea, antzerkian hitza da nagusi, eta eszenako alboetan eserita zeuden lau antzezleetariko bat —bi neska eta bi mutil izan dira— aulkitik altxatu eta hizketan hasi den unean bertan jakin dugu emanaldi kementsu baten aurrean geundela, eta egitate horrek gure animoak piztu eta bihotzak berotu ditu. Akabo proposamen epelak, fuera teknika erakustaldi ustez txundigarriak baina benetan hutsal eta aspergarriak! Hemen teknika dago —teknika landua, zinez—, hemen bi emakumeen eta bi gizonen presentzia eszeniko eztabaidaezina dago, hemen ez doa bakoitza bere aldetik bere luzimendu pertsonalaren bila. Hemen talde kohesionatu bat dago, bere ideia bikainak helburu baten zerbitzura jartzen dituena.

      Esan bezala, Armiarma du izena antzezlanak, eta haren izendapenaz baliatuta, armagintzaz aritu dira gehienbat hainbat ekintza eszenikoren bidez. Eta bide batez, edozein langileren lan-baldintzez aritu dira, eta enpresek azken hamarkadetan izan duten bilakaeraz, enpresa-irudia zuritzeko teknikez, lanerako casting aurrefabrikatuez eta norberak bere buruaz daukan irudiaz. Ez da gauza makala gero Katiuskakoek taula gainera ekarri dutena!

      Elementu eszenikoei dagokienez, krema koloreko txandal berdinak jantzi dituzte laurek, genero kontuak horrela ezabatuz, eta txapel koloredun politekin hornitu dituzte buruak. Sare zuriekin eta muleta birekin irudikatu dituzte noizean behin aramuen presentzia, eta erdiko zutabe batetik zintzilikaturiko flexoek armiarma handi baten mugimendua gogoratu digute.

      Elkarrizketak, abestiak, bakarrizketa eredugarriak, irudimenezko hizkuntza batetik euskaratutako hitzaldi dibertigarria, pasarte koreografiatuak, umorerako tarte ugariak... denetarik gertatu da di-da batean igaro den ordubete horretan. Azkenik, euskararen tratamendua goraipatuko dugu, era pertinentean tartekatu direlako erregistro jasoa eta hurbila, Tolosaldeko hizkera eta euskara batua, denon gozamenerako, eta horrek balio berezia eman diolako berez bikain funtzionatu duen proposamenari.